* ఇదీ హైదరాబాద్ లో కో-లివింగ్ కల్చర్..
* కుప్పలు తెప్పలుగా వెలిసిన కో-లివింగ్ హాస్టల్స్
* పోలీసులే పార్టనర్లుగా నడుస్తున్నాయంటున్న ఓనర్స్..
* గూటికి చేరేందుకు కొత్త జంటల ఆసక్తి..
హైదరాబాద్ నగరంలో కో-లివింగ్ హాస్టళ్ల పేరుతో విష సంస్కృతి రోజురోజుకీ విస్తరిస్తోంది. ఎక్కడిపడితే అక్కడ నగరంలో కుప్పలు తెప్పలుగా కో-లివింగ్ పీజీ హాస్టళ్లు వెలుస్తున్నాయి. ఓయో హోటళ్లను తలదన్నేలా వెలిసిన ఈ హాస్టళ్లలో ఒకే గదిలో అమ్మాయి, అబ్బాయి ఉండొచ్చంటూ ఓనర్స్ తెగ ఆఫర్లు ఇచ్చేస్తున్నారు. అంతేకాదు.. అమ్మాయిని మీరు తెచ్చుకుంటారా..? లేక మిమ్మల్ని అరేంజ్ చేయమంటారా..? అంటూ యువతకు వల వేస్తున్నారు. పోలీసులు కూడా మా హాస్టళ్లకు పార్టనర్సే..ఎలాంటి భయం అవసరం లేదని బహిరంగంగా చెబుతున్నారు. దీంతో కొత్త కొత్త జంటలు ఈ గూటికి చేరేందుకు ఆసక్తి చూపుతున్నాయి.
కో లివింగ్.. ఈ పదం చాలా అరుదుగా వింటుంటాం. కానీ ఇప్పుడు ఈ కల్చర్ హైదరాబాద్ నగరంలో కామన్ అయిపోయింది. పెళ్లి కాకుండానే రిలేషన్ షిప్లో అమ్మాయిలు, అబ్బాయిలు కలిసి ఓకే హాస్టల్ లేదా ప్లాట్ తీసుకొని ఉండటాన్ని కో లివింగ్ అంటారు. మన సంస్కృతి, సాంప్రదాయాలకు కాస్త భిన్నంగా అనిపించినా ప్రస్తుతం ఈ కో లివింగ్ కల్చర్ ట్రెండ్గా మారింది.
హైదరాబాద్ నగరంలో అమీర్పేట్, ఎస్ఆర్ నగర్, మాదాపూర్, గచ్చిబౌలి, కేపీహెచ్బీ, రాయదుర్గం వంటి ఏరియాలో ఈ కో లివింగ్ కల్చర్ కాస్త ఎక్కువగా కనబడుతుంది. ముంబాయి, ఢిల్లీ, కోల్కత్తా, బెంగళూరు లాంటి ప్రాంతాల్లో ఈ తరహా లివింగ్ స్టైల్ ఉండేది. క్రమేపీ అది తెలుగు రాష్ట్రాలకు సైతం పాకింది. సుప్రీంకోర్టు గైడ్ లైన్స్ ప్రకారం ఇద్దరు మేజర్లు కలిసి ఉండడంలో లీగల్గా ఎలాంటి తప్పులేదని చెబుతున్నా.. ఈ కో లివింగ్ రిలేషన్స్ ద్వారా కొన్ని అబ్యూజ్, క్రైమ్స్కు దారి తీసే అవకాశాలు కూడా లేకపోలేదు.
అయితే, కో లివింగ్ అంటూ యువత పెడుదోవ పడుతోందని సామాజిక వేత్తలు ఆందోళన వ్యక్తం చేస్తున్నారు. ఇతర రాష్ట్రాల్లో ఉన్న కల్చర్ను హైదరాబాద్కు సైతం తీసుకువచ్చారని, అమ్మాయిలు, అబ్బాయిలు ఓకే రూమ్లో ఉన్నంత సేపు ఎలాంటి సమస్యలు ఉండవు కానీ.. వారి మధ్య మనస్పర్ధలు వచ్చిన్పపుడు ఇద్దరి కలిసి ఉన్న ఫొటోలు, వీడియోలతో బెదిరింపులకు దిగడం లాంటి ఘటనలు సైతం తెరపైకి వస్తున్నాయని అంటున్నారు. తల్లిదండ్రులకు తెలియకుండా యువత ఇలాంటి కో-లివింగ్ రిలేషన్స్లో ఉంటున్నారని, అది మంచిది కాదని అంటున్నారు. కో లివింగ్ హాస్టళ్లు హైదరాబాద్ నగరంలో పుట్టగొడుగుల్లా వెలుస్తున్నాయని, సాధారణమైన హాస్టల్స్కు ఎలాంటి అనుమతులు, నిబంధనలు ఉంటాయో వీటికి కూడా అవే వర్తిస్తాయని అంటున్నారు న్యాయ నిపుణులు. పిల్లల కదలికలపై పేరెంట్స్ కూడా ఓ కన్నేయాలని అంటున్నారు. కో- లివింగ్ కల్చర్ను కొందరు సమర్థిస్తుంటే.. మరికొందరు మాత్రం తస్మాత్ జాగ్రత్త అంటూ హెచ్చరిస్తున్నారు. మరి పోలీసులు, ప్రభుత్వం ఇలాంటి హాస్టళ్ల నిర్వాహకులపై చర్యలు తీసుకుంటారా..? లేక ఈ విష సంస్కృతిని ప్రోత్సహిస్తారా..? అన్నది చూడాలి.
