విజయవాడ: ఏపీలో పెట్రోల్, డీజిల్ ధరలపై ఏపీసీసీ చీఫ్ వైఎస్ షర్మిల మండిపడ్డారు. పక్కనున్న రాష్ట్రాల్లో కంటే ఆంధ్రప్రదేశ్ లో పెట్రోల్, డీజిల్ ధరలు ఎక్కువగా ఉన్నాయని ఆగ్రహం వ్యక్తం చేశారు. కూటమి ప్రభుత్వాన్ని గెలిపిస్తే ఇంధనంపై పన్ను తగ్గిస్తామని హామీ ఇచ్చారని.. ఇప్పుడు దాన్ని తుంగలో తొక్కారని… దానికి సమాధానం చెప్పాలని డిమాండ్ చేశారు. రాష్ట్రంలో పెట్రోల్ రూ. 109.60 పైసలు, డీజిల్ రూ 97.47 పైసలుగా ఉండగా…పక్కనున్న తమిళనాడు రాష్ట్రంలో లీటరు పెట్రోల్ రూ.100.86 పైసలు, డీజిల్ రూ.92.39పైసలని తెలిపారు. తమిళనాడుతో పోల్చితే మన దగ్గర పెట్రోల్ మీద 9 రూపాయలు, డీజిల్ మీద 5 రూపాయలు ఎక్కువ ఉందన్నారు. కర్ణాటకలో లీటరు పెట్రోల్ రూ.102.90పైసలు, డీజిల్ రూ.88.99పైసలు ఉందని.. కర్ణాటకతో పోల్చినా… ఏపీలో పెట్రోల్ మీద లీటరుకు 7 , డీజిల్ మీద 9 రూపాయలు ఎక్కువగా ఉందని చెప్పారు.

ఇక తెలంగాణలో లీటరు పెట్రోల్ . రూ 107.46పైసలు, డీజిల్ రూ. 95.70పైసలుగా ఉందన్నారు. తెలంగాణతో పోల్చినా ఏపీలో లీటరు మీద 3 రూపాయలు అదనంగా ఉందని చెప్పుకొచ్చారు షర్మిళ . పన్నులు అధికంగా వసూలు చేసినప్పటికీ అభివృద్ధి శూన్యం అని విమర్శించారు. పెట్రోల్, డీజిల్ మీద పన్నుల తగ్గింపు విషయంలో టీడీపీ, వైసీపీ పార్టీలవి నీచ రాజకీయాలని మండిపడ్డారు. ప్రతిపక్షంలో ఉన్నప్పుడు ఒకలాగా…. అధికారపక్షంలో ఉన్నాప్పుడు మరోలాగా ఉంటాయాన్నారు. వ్యాట్ పేరుతో ఏ రాష్ట్రంలో లేనంతగా ప్రజలపై పన్నులు వసూలు చేస్తున్నారని విమర్శించారు.

గత 5 ఏళ్లలో రూ.25 వేల కోట్ల మేరకు ఇంధనం మీద అదనపు పన్నులు వసూలు చేశారన్నారు షర్మిళ . 10 ఏళ్లలో ప్రజల నుంచి రూ.50 వేల కోట్లు బాదేశారన్నారు. చంద్రబాబు ప్రతిపక్షంలో ఉండగా పెట్రోల్, డీజిల్ ధరలను గణనీయంగా తగ్గించవచ్చని…లీటరుకు 17 రూపాయలు తగ్గించాలని డిమాండ్ చేశారన్నారు. ఇప్పుడు అధికారంలో ఉన్నారని… ఇచ్చిన హామీ ప్రకారం ఎప్పటి నుంచి ధరలు తగ్గిస్తారో చెప్పాలని డిమాండ్ చేశారు.